Caras Rodesencas, cars Rodesencs,
Rodés merita una ambicion novèla.
D’unes, coma ieu, i son nascuts, d’autres s’i son installats, portats per l’atrach d’una vila qu’ofresís una qualitat de vida que devèm duèi preservar a plec .
La fòrça de la nòstra ciutat, aquò’s lo seu patrimòni, la siá istòria, la siá identitat. Son tanben e subretot las femnas e los òmes que l’an bastida, generacion aprèp generacion, los comerçants, los artesans, los caps d’entrepresas, los benevòls de las associacions culturalas e esportivas mas tanben los retirats e los salariats que, pel lor trabalh, la lor energia, la fan viure cada jorn.
Fòrça foguèt fach e soi urosa e ufanosa d’i aver contribuït coma elegida al Conselh Municipal. Mas, cadun o vei, o sentís, d’escomesas novèlas nos espèran, de desfises importants que lor fan mestièr una ambicion novèla, un buf novèl, un metòde novèl.
La pojada de l’inseguritat e de las incivilitats, la netetat per totes los barris, la dificultat a trobar un mètge o un especialista, l’abandon de la botigas de proximitat non son pas una fatalitat. A condicion que i respondèm, rapidament e fèrmament.
Trabalhar, estudiar, se lotjar, se sonhar, se desplaçar, se cultivar, se divertir… Òc-ben, nos cal far mai aisida la vida del monde e de las familhas, al moment que lo poder de crompa es estat fragilizat aquestas annadas passadas.
Protegir cada jorn la populacion per l’escota, la proximitat e l’accion, anticipar deman amb una vision clara e volontarista, en tot garantissent de finanças sanas per poder investir : aquò’s per ieu la primièra responsabilitat de la còla municipala que ven. Aquò’s lo meu engajtament davant vosautres.
Èsser cònsol màger, es far de causida, a partir de la realitat de vida dels estatjants, dels vòstres besonhs, amb biais e responsabilitat.
Èsser cònsol màger, es escotar, privilegiar lo collectiu, acompanhar, sosténer sense exclure pas degun, recampar e federar a l’entorn d’objectius partetjats.
Èsser cònsol màger, es portar e encarnar una vision, en tot s’apujant suls atots de la nòstra vila.
Rodés merita que nos i vodam dins la globalitat. Que totes los barris pòscan èsser acompanhats e reabilitats amb la meteissa intensitat e la meteissa energia.
La nòstra volontat es de téisser de ligams, religar las generacions e crear de ponts entre los diferents barris.
Aquí perqué m’entornegi d’una còla, competenta e passionada, que lo sol partit pres es de s’engatjar per Rodés. Una còla que vos sembla e qu’amassa totas las fòrças vivas de la vila e totas las generacions.
Dins qualques setmanas, vos presentarem un projècte per Rodés, bastit amb vosautres, un projècte concret e realista, un projècte ambiciós e positiu, que plaça los estatjants al còr de las decisions.
